മാലിന്യം വളമാക്കാൻ ടെറാകോട്ട ടാങ്ക്: ഗാർഹികാവശിഷ്ടങ്ങൾ മണ്ണിരക്കംപോസ്റ്റാക്കാം

3/6/25

editor

മണ്ണിലേക്കു വലിച്ചെറിയപ്പെടുന്ന മാലിന്യങ്ങൾ സൃഷ്ടിക്കുന്ന പാരിസ്ഥിതിക പ്രശ്നങ്ങൾ ചില്ലറയല്ല. നമ്മുടെ വീണ്ടുവിചാരമില്ലായ്മ മണ്ണിനെ വലിയൊരു ചവറ്റുകൂനയാക്കി മാറ്റും. പരിമിതമായ സ്ഥലസൗകര്യത്തെയും നവീന ജീവിതശൈലിയെയും പഴിക്കുന്ന നമ്മൾ, മാലിന്യത്തെ ഒന്നാന്തരം കംപോസ്റ്റാക്കാനുള്ള സാധ്യതകള്‍ സൗകര്യപൂർവം മറക്കുന്നു. ഒരു ടെറാകോട്ട ചട്ടിയുണ്ടെങ്കിൽ നിന്നുതിരിയാൻ ഇടമില്ലാത്ത ഫ്ലാറ്റിൽ പോലും എളുപ്പത്തിൽ മാലിന്യസംസ്കരണം നടക്കും. ഏകദേശം ഒരു മീറ്റർ ഉയരവും മധ്യഭാഗത്ത് ഒരു മീറ്റർ ചുറ്റളവുമുള്ള മൺകലവും അടച്ചുവയ്ക്കാൻ പാകത്തില്‍ ചട്ടി അടപ്പുമാണ് ഈ ടാങ്കിന്റെ പ്രധാന ഭാഗങ്ങൾ. വെള്ളം നിറച്ച ചെറിയ ബേസിനിലാണ് ടാങ്ക് ഇറക്കി വയ്ക്കുന്നത്. നേരിയ വെയിലും മഴയും ലഭിക്കുന്നിടത്ത് ടാങ്ക് വയ്ക്കാം. അടുക്കളയിലോ വർക്ക് ഏരിയയിലോ കാർപോർച്ചിൽ പോലുമോ ഈ മൺകുടം വയ്ക്കാം. ചുവരിനോടു ചേർത്ത് വയ്ക്കരുതെന്നുമാത്രം. ആഹാരാവശിഷ്ടങ്ങൾ, പച്ചക്കറി അവശിഷ്ടങ്ങ ൾ, ഉണക്കയില എന്നു വേണ്ട എല്ലാ ജൈവമാലിന്യങ്ങളും മണ്ണിരക്കംപോസ്റ്റാക്കാൻ ഈ ടെറാക്കോട്ട മിടുക്കിയാണ്. എന്നാലിതില്‍ പ്ലാസ്റ്റിക്, കുപ്പി തുടങ്ങിയ അജൈവ മാലിന്യങ്ങളൊന്നും ഇടരുത്.