കൃഷി തുടങ്ങിയത് വൈറ്റമിൻ ഡിയുടെ കുറവ് പരിഹരിക്കാൻ: മികച്ച നേട്ടവുമായി ദമ്പതികളുടെ ‘മൂൺകൂൺ’

31/5/25

editor

കൂൺകൃഷിയെന്നു കേൾക്കുമ്പോൾ ഇരുൾ നിറഞ്ഞൊരു മുറിയിൽ വൈക്കോൽ നിറച്ച കൂടുകളാണോ ഓർമ വരുന്നത്? മുഹമ്മ ആര്യക്കരയിലെ ‘മൂൺകൂൺ’ ഫാമിലേക്കു കയറുമ്പോൾ പക്ഷേ ഒരു എസി മിനി ഹാളാണു മനസ്സിലെത്തുക. ബബിൾ ഷീറ്റ് കൊണ്ടു പൊതിഞ്ഞ ചുവരുകൾ, നിലത്തു തിളങ്ങുന്ന ഫ്ലോറിങ് ഷീറ്റ്, വെളിച്ചത്തിൽ കുളിച്ചു നിൽക്കുന്ന ഫാമിനുള്ളിൽ മനം കുളിർക്കുന്ന തണുപ്പ്. അവിടെ ആയിരത്തിലേറെ കൂൺബെഡുകളിൽ വിരിഞ്ഞു നിൽക്കുന്ന ചിപ്പിക്കൂണുകളുടെ വെൺമ. വൈക്കോൽ നിറച്ച കൂടകൾക്കു പകരം റബർമരത്തിന്റെ ഈർച്ചപ്പൊടി കൊണ്ടുള്ള റെഡിമെയ്ഡ് മഷ്റൂം പെല്ലറ്റ് ഉപയോഗിച്ചാണു കൂൺബെഡുകൾ. ബെഡുകളിലേക്ക് ഇടയ്ക്കിടെ വെള്ളം സ്പ്രേ ചെയ്യേണ്ട; ഫാമിനുള്ളിൽ ഈർപ്പം നിലനിർത്താൻ ഹൈടെക് മാർഗങ്ങളുണ്ട്.