ഒരു ചക്കയിൽനിന്ന് 1000 രൂപ! യുവ സംരംഭകൻ സംസ്കരിക്കുന്നത് ദിവസം 8 ടൺ; വേറിട്ട രുചിയായി കശുവണ്ടി

28/5/25

Editor

താഴെ വീണ് ചീഞ്ഞളിഞ്ഞു പോകുമായിരുന്ന ഒരു ചക്കയിൽനിന്ന് 1000 രൂപ വരുമാനമുണ്ടാക്കാൻ സാധിക്കുമെന്ന് കണ്ണൂർ ആത്മ പ്രോജക്ട് ഡയറക്ടർ എ.സുരേന്ദ്രൻ പറഞ്ഞപ്പോൾ പരമ്പരാഗത കൃഷിക്കാർക്ക് അതൊരു പുതിയ അറിവായിരുന്നു. വിളകളുടെ മൂല്യവർധന സാധ്യതകൾ എന്ന വിഷയത്തിൽ സംസാരിക്കുകയായിരുന്നു അദ്ദേഹം. കാർഷികവിളകളുടെ വില മറ്റുള്ളവർ നിശ്ചയിച്ച് കർഷകർ വിൽക്കുന്ന കാലം മാറിയെന്നും മൂല്യവർധിത ഉൽപന്നങ്ങളിലൂടെ കൃഷിക്കാരാണു തങ്ങളുടെ ഉൽപന്നങ്ങളുടെ വില നിശ്ചയിക്കുന്നതെന്നും അദ്ദേഹം പറഞ്ഞു. കോവിഡ് കാലത്ത് എന്തുചെയ്യുമെന്നറിയാതെ വിളവെടുത്ത കശുവണ്ടിയിൽനിന്ന് മൂല്യവർധിത ഉൽപന്നങ്ങൾ നിർമിച്ചു വിജയം കണ്ടെത്തിയതിനെക്കുറിച്ചായിരുന്നു ഉളിക്കൽ സ്വദേശിയായ ബ്രിജിത്ത് കൃഷ്ണയ്ക്കു പറയാനുണ്ടായിരുന്നത്. കേരളത്തിലെ ആവശ്യത്തിനുള്ള കശുവണ്ടിപോലും ഇവിടെ ഉൽപാദിപ്പിക്കുന്നില്ല. ഇവിടെയുണ്ടാക്കുന്ന കശുവണ്ടികൊണ്ട് വിദേശികൾക്ക് മൂല്യവർധിത ഉൽപന്നങ്ങൾ ഉണ്ടാക്കി വിപണി കണ്ടെത്തുകയാണ് വേണ്ടതെന്ന് ബ്രിജിത്ത് കൃഷ്ണ പറഞ്ഞു.