വിജയകരമായി പോളിഹൗസ് കൃഷി തുടരുന്ന നെടുമങ്ങാട് സ്വദേശി ഷെമീർ

14/5/25

Editor

ഹൈടെക് കൃഷിയിലേക്കുള്ള സംസ്ഥാനത്തിന്റെ ആദ്യ ചുവടുവയ്പ് 2011–14 കാലത്ത് പ്രചാരം നേടിയ പോളിഹൗസ് കൃഷിയിലൂടെയായിരുന്നു. ആവേശത്തോടെ തുടങ്ങിയ പലരും പക്ഷേ വൈകാതെ പോളിഹൗസ് പൂട്ടി. കാരണങ്ങൾ പലതായിരുന്നു. ഷെമീറിന്റെ വാക്കുകളിൽ പറഞ്ഞാൽ പോളിഹൗസ് കൃഷിക്കു ചാടിപ്പുറപ്പെട്ട പലരും കൃഷിക്കാർപോലുമായിരുന്നില്ല. പുതു സംരംഭമല്ലേ, ഒരു കൈ നോക്കിയാലോ എന്നും ഹൈടെക് അല്ലേ, എല്ലാം യന്ത്രങ്ങൾ നോക്കിക്കൊള്ളുമല്ലോ എന്നും കരുതിയാണ് പലരും വന്നത്. ഉദ്ദേശിച്ചപോലെ കാര്യങ്ങൾ നീങ്ങിയില്ല, പോളിഹൗസിലെ ഈർപ്പവും താപനിലയുമൊന്നും നിയന്ത്രിക്കാൻ കഴിയാതെ വിളനഷ്ടം നേരിടുകയും ചെയ്തു. പോളിഹൗസിൽനിന്നുള്ള കാർഷികോൽപന്നങ്ങൾക്കു വിപണിയിൽ പ്രത്യേക പരിഗണന കിട്ടിയതുമില്ല. ചുരുക്കത്തിൽ, മിക്കവരും പണി മതിയാക്കി ഷെഡിന് താഴിട്ടു. അക്കാലത്താണ് തിരുവനന്തപുരം നെടുമങ്ങാട് സ്വദേശി എസ്.ഷെമീർ എന്ന ചെറുപ്പക്കാരൻ പുതിയൊരു പോളിഹൗസ് തുറക്കുന്നത്. 25 സെന്റ് പോളിഹൗസിൽനിന്ന് ഇന്ന് എല്ലാ ചെലവും കഴിഞ്ഞ് വർഷം 3 ലക്ഷം രൂപ ലാഭം ഷെമീർ നേടുന്നു. പോളിഹൗസ് കൃഷിയില്‍ വൻ ലാഭമൊന്നും പ്രതീക്ഷിക്കുന്നില്ല ഈ യുവകർഷകൻ. സ്ഥിരവരുമാനമാണ് പ്രധാനം. ഒപ്പം, പുതിയ ഇനങ്ങളും വിപണനസാധ്യതകളും പ്രയോജനപ്പെടുത്തി പടിപടിയായുള്ള വരുമാന വർധനയും.