അടുത്ത മുഖ്യമന്ത്രിയാരാകുമെന്ന കാര്യത്തിൽ കോൺഗ്രസുകാർ തർക്കിക്കേണ്ടതില്ലെന്ന്‌ സിപിഐ എം സംസ്ഥാന സെക്രട്ടറി എം വി ഗോവിന്ദൻ.

22/5/25

Editor

പെരുനാട്‌ (പത്തനംതിട്ട): അടുത്ത മുഖ്യമന്ത്രിയാരാകുമെന്ന കാര്യത്തിൽ കോൺഗ്രസുകാർ തർക്കിക്കേണ്ടതില്ലെന്ന്‌ സിപിഐ എം സംസ്ഥാന സെക്രട്ടറി എം വി ഗോവിന്ദൻ. മൂന്നാംവട്ടവും അക്കാര്യം എൽഡിഎഫ്‌ തീരുമാനിക്കുമെന്നും അദ്ദേഹം പറഞ്ഞു. പെരുനാട്‌ രക്തസാക്ഷി ജിതിൻ ഷാജിയുടെ കുടുംബസഹായ ഫണ്ട്‌ കൈമാറുകയായിരുന്നു അദ്ദേഹം, മുഴുവൻ പാവപ്പെട്ടവർക്കും വീടൊരുക്കുന്ന സംസ്ഥാനമായി കേരളം മാറുകയാണ്‌. ലോകത്തിൽതന്നെ ഇത്തരമൊരുമുന്നേറ്റം നടത്തുന്ന നാട്‌ കേരളമായിരിക്കും. അതിദരിദ്രരില്ലാത്ത ആദ്യത്തെ ഇന്ത്യൻ സംസ്ഥാനമായി മാറാനും കേരളം തയാറെടുക്കുകയാണ്‌. തൊഴിലില്ലായ്‌മയും പടിപടിയായി പരിഹരിച്ചുകൊണ്ടിരിക്കുകയാണ്‌. ലോകത്തെ വലിയ തുറമുഖമായി വിഴിഞ്ഞത്തെ മാറ്റിയെടുത്തത്‌ സംസ്ഥാന സർക്കാരിന്റെ ഇടപെടലിലൂടെയാണ്‌. വരുന്ന തദ്ദേശ തെരഞ്ഞെടുപ്പിൽ എൽഡിഎഫിന്‌ മികച്ച വിജയം നേടാനാകുമെന്നും അദ്ദേഹം പറഞ്ഞു.