കൊച്ചിയിലെ കെല്‍ട്രോ ഡയറക്ട് മാര്‍ക്കറ്റിങ് സ്ഥാപനത്തിനെതിരെ പരാതി

07/04/2025

Jerin P Thomas

കൊച്ചി : കൊച്ചിയിലെ പ്രമുഖ സ്ഥാപനമായ കെൽട്രോ ഡയറക്‌ട് മാർക്കറ്റിങ്നെതിരെ പരാതിയുമായി യുവതി രംഗത്ത്. തൻ്റെ കഴുത്തിൽ ബെൽറ്റിട്ട്, മുട്ടു കുത്തിച്ച ശേഷം തറയിൽ കടലാസ് ചുരുട്ടിയിട്ടു കടിച്ചെടുക്കാൻ ആവശ്യപ്പെട്ടെന്ന് യുവതി പരാതിയിൽ ബോധിപ്പിക്കുന്നു. കഴിഞ്ഞ ദിവസങ്ങളിൽ സോഷ്യൽ മീ‍ഡിയകളിൽ ഈ സ്ഥാപനത്തിലെ യുവാവിനെ നായയെപ്പോലെ നടത്തിയ വീഡിയോ പ്രചരിച്ചതോടെയാണു തന്നെയും നടത്തിച്ചെന്ന പരാതിയുമായി യുവതിയും രംഗത്തെത്തിയത്. കഴുത്തിൽ ബെൽറ്റിട്ടു മുട്ടു കുത്തിയിരുന്നെങ്കിലും കടലാസ് കടിച്ചെടുത്തില്ല. വിഡിയോ ചിത്രീകരിക്കാനും സമ്മതിച്ചില്ലെന്നും യുവതിയുടെ പരാതിയിൽ പറയുന്നു. സ്ഥാപനത്തിൽ ഫീൽഡ് സ്റ്റാഫായി ജോലി ചെയ്യുന്ന കൊല്ലം സ്വദേശിനിയായ യുവതി കഴിഞ്ഞ ദിവസം യുവാവിൻ്റെ വീഡിയോ പ്രചരിച്ചതോടെയാണു പോലീസിൽ പരാതി നൽകിയത്. വീഡിയോ പ്രചരിപ്പിച്ച സംഭവത്തിൽ മുൻ മാനേജർ കോഴിക്കോട് വടകര പാറക്കണ്ടി വീട്ടിൽ മനാഫിനെതിരെ പോലീസ് കേസെടുത്തു. സ്ത്രീത്വത്തെ അപമാനിച്ചു എന്ന വകുപ്പു ചുമത്തിയാണു കേസ്. വീഡിയോ ദൃശ്യങ്ങളിലെ യുവാക്കളുടെ മൊഴിയുടെ അടിസ്ഥാനത്തിൽ കോടതി അനുമതിയോടെ മാനനഷ്ടത്തിനും കേസെടുക്കും.