മ്യാൻമറിൽ മരണസംഖ്യ ഉയരുന്നു

29/03/2025

Rakhi Pradeep

നയ്‌പീഡോ : തായ്ലൻഡിനെയും മ്യാൻമറിനെയും പിടിച്ചുകുലുക്കിയ ഭൂകമ്പത്തിൽ മരണസംഖ്യ കുതിച്ചുയരുന്നു. ഇതുവരെ മ്യാൻമറിൽ മാത്രം 694 പേരുടെ മരണം സ്‌ഥിരീകരിച്ചതായി പട്ടാള ഭരണകൂടം അറിയിച്ചു. 1670 പേർക്ക് പരുക്കേറ്റു. തായ്ല‌ൻഡിൽ എട്ടു പേരുടെ മരണം സ്‌ഥിരീകരിച്ചിട്ടുണ്ട്. മ്യാൻമറിൽ പട്ടാള ഭരണകൂടം ആറിടങ്ങളിൽ അടിയന്തരാവസ്‌ഥ പ്രഖ്യാപിച്ചു 7.7 തീവ്രത രേഖപ്പെടുത്തിയ ഭൂകമ്പം പ്രാദേശിക സമയം ഇന്നലെ ഉച്ചയ്ക്കു 12.50നാണ് ഉണ്ടായത്. പിന്നാലെ 6.4 തീവ്രതയുള്ള മറ്റൊരു ഭൂകമ്പവുമുണ്ടായി. മ്യാൻമറിലെ സാഗെയിങ് നഗരത്തിനു സമീപത്താണ് പ്രഭവകേന്ദ്രമെന്ന് യുഎസ് ജിയോളജിക്കൽ സർവേ പറഞ്ഞു. ഇന്ത്യ, ബംഗ്ലദേശ്, ചൈന എന്നിവിടങ്ങളിലും പ്രകമ്പനം അനുഭവപ്പെട്ടു ഇന്നലെ രാത്രിയിൽ വീണ്ടും മ്യാൻമറിൽ 4.2 തീവ്രത രേഖപ്പെടുത്തിയ ഭൂകമ്പമുണ്ടായി.