ബിജെപി ഗുണ്ടായിസത്തിനെതിരെ പ്രതിഷേധം

01/03/2025

തൊടുപുഴ : തൊടുപുഴ നഗരസഭാ ചെയർപേഴ്‌സൺ സബീന ബിഞ്ചുവിനെ വഴിയിൽ തടയുകയും ഭീഷണിപ്പെടുത്തുകയും അപമാനിക്കുകയും ചെയ്‌ത ബിജെപി ഗുണ്ടായിസത്തിനെതിരെ പ്രതിഷേധം ഇരമ്പി. സിപിഐ എം സംഘടിപ്പിച്ച പ്രടകനത്തിലും യോഗത്തിലും സ്ത്രീകളടക്കം നിരവധിപേർ അണിനിരന്നു. പ്രകടനം കാഞ്ഞിരമറ്റം എവർഷൈൻ ജങ്ഷനിൽനിന്ന് ആരംഭിച്ചു. കാഞ്ഞിരമറ്റം അമ്പലംകവലയിൽ ചേർന്ന യോഗം ജില്ലാ സെക്രട്ടറി സി വി വർഗീസ് ഉദ്ഘാടനംചെയ്തു. ഒരു സാമൂഹ്യവിരുദ്ധൻ്റെ വിവരക്കേടാണ് കാഞ്ഞിരമറ്റത്ത് നടന്നതെന്ന് അദ്ദേഹം പറഞ്ഞു. സാമൂഹ്യവിരുദ്ധരെ ഉപയോഗിച്ച് സിപിഐ എമ്മിനെ ആക്രമിച്ച് സമാധാനാന്തരീക്ഷം തകർക്കാനുള്ള ശ്രമമാണ് ബിജെപി നടത്തിയത്. മതേതര മനസുള്ള നാടാണ് കേരളം. അവർണർക്ക് ക്ഷേത്ര പ്രവേശനത്തിന് സമരം നടത്തി മർദ്ദനമേറ്റവരാണ് കമ്യൂണിസ്റ്റുകാർ. സംഘർഷത്തിനല്ല സമാധാനമാണ് പാർടി ആഗ്രഹിക്കുന്നത്. ആർഎസ്എസിന് ഏറ്റവും ശാഖകളുള്ള സംസ്ഥാനം കേരളമാണ്.