13കാരന് 10 വർഷമായി പിതാവിൻ്റെ ക്രൂരമായ പീഡനം

27/02/2025

കലഞ്ഞൂർ : മദ്യപിച്ചു വീട്ടിലെത്തി 13 വയസ്സുകാരനെ നിരന്തരം അതിക്രൂരമായി മർദിച്ച സംഭവത്തിൽ പിതാവ് അറസ്‌റ്റിൽ. ഒൻപതാം ക്ലാസ് വിദ്യാർഥിക്കാണു പിതാവിൻ്റെ മർദനമേറ്റത്. കുട്ടിയെ മാസങ്ങളായി ബെൽറ്റും മറ്റ് സാധനങ്ങളും ഉപയോഗിച്ച് മർദിച്ചിരുന്ന ഇയാളെ ചൈൽഡ് വെൽഫെയർ കമ്മിറ്റിയുടെ ഇടപെടലിലൂടെയാണു പൊലീസ് കസ്‌റ്റഡിയിലെടുത്തത്. രാത്രി മദ്യപിച്ച് വീട്ടിലെത്തുന്ന പിതാവ് മകനെ മർദിക്കുന്നതിന്റെ വിഡിയോ ദൃശ്യങ്ങൾ സമൂഹമാധ്യമങ്ങളിൽ പ്രചരിച്ചതോടെയാണു സംഭവം പുറംലോകമറിഞ്ഞത്. അമ്മ എടുത്ത വിഡിയോ സ്കൂൾ അധികൃതർക്ക് ലഭിക്കുകയും പിന്നീട് ചൈൽഡ് വെൽഫെയർ കമ്മിറ്റിക്ക് കൈമാറുകയുമായിരുന്നു. തുടർന്ന് കൂടൽ പൊലീസിനു വിവരം കൈമാറി കുട്ടിയുടെ മൊഴി രേഖപ്പെടുത്തി പിതാവിനെതിരെ കേസെടുക്കുകയും തുടർന്ന് കസ്‌റ്റഡിയിൽ എടുക്കുകയുമായിരുന്നു.