മലപ്പുറത്ത്‌ ഇനി എല്‍ഡിഎഫ്

05/02/2025

നിലമ്പൂർ : മലബാർ മേഖലാ സഹകരണ ക്ഷീരോൽപ്പാദക യൂണിയൻ ഭരണസമിതി തെരഞ്ഞെടുപ്പിൽ യുഡിഎഫിൻ്റെ സിറ്റിങ് സീറ്റുകൾ മലപ്പുറം ജില്ലയിൽ പിടിച്ചെടുത്ത് എൽഡിഎഫ്. വി സുധാകരൻ കെപിസിസി അംഗവും മുൻ ജില്ലാ പഞ്ചായത്ത് അംഗവുമായിരുന്ന പാനലിനെ പരാജയപ്പെടുത്തിയാണ് എൽഡിഎഫ് വിജയം. മൂന്ന് യുഡിഎഫ് സിറ്റിങ് സീറ്റുകളാണ് എൽഡിഎഫ് പിടിച്ചെടുത്തത്. എൽഡിഎഫ് സ്ഥാനാർഥികളായ യു സി മുഹമ്മദ് കോയ, എം സണ്ണി ജോസഫ്, ടി സുഹൈൽ എന്നിവരാണ് വിജയിച്ചത്. മിൽമ നിലമ്പൂർ മാർക്കറ്റിങ് ഡിപ്പോയിലാണ് തെരഞ്ഞെടുപ്പ് നടന്നത്. നാൽപ്പതിൽ താഴെ വയസുള്ളവരുടെ പൊതുവിഭാഗത്തിൽ എൽഡിഎഫ് സ്ഥാനാർഥി ടി സുഹൈൽ എതിരില്ലാതെ വിജയിച്ചിരുന്നു. ജില്ലയിൽ വോട്ടവകാശമുള്ള 227 ക്ഷീരോൽപ്പാദക സംഘം പ്രസിഡന്റുമാരിൽ 226 പേർ വോട്ട് രേഖപ്പെടുത്തി. എൽഡിഎഫ് സ്ഥാനാർഥികളായ യു സി മുഹമ്മദ് കോയക്ക് 124 വോട്ടും എം സണ്ണി ജോസഫിന് 128 വോട്ടും ലഭിച്ചു. യുഡിഎഫ് സ്ഥാനാർഥികളായ എം വാസുദേവന് 87 വോട്ടും വി സുധാകരന് 101 വോട്ടുമാണ് ലഭിച്ചത്. ജില്ലയിൽ ആദ്യമായിട്ടാണ് മുഴുവൻ സീറ്റിലും എൽഡിഎഫ് വിജയിക്കുന്നത്. വിജയത്തിനുശേഷം എൽഡിഎഫ് പ്രവർത്തകർ നിലമ്പൂർ ടൗണിൽ ആഹ്‌ലാദപ്രകടനം നടത്തി. കർഷക സംഘം ജില്ലാ സെക്രട്ടറി വി എം ഷൗക്കത്ത്, സിപിഐ എം ജില്ലാ കമ്മിറ്റി അംഗങ്ങളായ ഇ പത്മാക്ഷൻ, കെ മോഹനൻ, ബി മുഹമ്മദ് റസാഖ്, സിപിഐ ജില്ലാ കമ്മിറ്റി അംഗങ്ങളായ പി എം ബഷീർ, എം മുജീബ് റഹ്മാൻ എന്നിവർ സംസാരിച്ചു.