കൊളുന്ത് നുള്ളൽ മത്സരം

05/02/2025

അമ്പനാട് : ചെമ്പതാകകളാൽ നിറഞ്ഞ പാതയോരങ്ങൾ കടന്ന് ഹരിതാഭയാർന്ന തേയിലത്തോട്ടത്തിനു മുന്നിൽ തൊഴിലാളികൾ മത്സരാവേശത്തിൽ കാത്തുനിന്നു. കൊല്ലം ജില്ലയിലെ ഏക തേയിലത്തോട്ടമായ അമ്പനാട് എസ്റ്റേറ്റ് ഉൾപ്പെടുന്ന അരണ്ടൽ വാർഡിലെ ഒമ്പതുമുക്കിലായിരുന്നു സിപിഐ എം സംസ്ഥാന സമ്മേളനത്തിനു മുന്നോടിയായി സിഐടിയു ജില്ലാ കമ്മിറ്റി സംഘടിപ്പിക്കുന്ന 'കൊളുന്തുനുള്ളൽ' മത്സരം. രാവിലെ ഒമ്പതോടെ തൊഴിലാളികൾ തോട്ടത്തിലേക്കു കയറി. പത്തു മിനിറ്റിൽ കൂടുതൽ കൊളുന്തു നുള്ളാനായിരുന്നു നിർദേശം. സംഘഗാനം പോലെ ഷിയർ മെഷിൻ്റെ താളം മുഴങ്ങി. സമയപരിധിയിൽ പരമാവധി കൊളുന്ത് നുള്ളി തൊഴിലാളികൾ താഴേക്കെത്തി. ബ്രോണി (ആറ് കിലോഗ്രാം) ഒന്നാം സ്ഥാനവും ജപമണി, ഗിരിജ (അഞ്ച് കിലോഗ്രാം) എന്നിവർ രണ്ടാംസ്ഥാനവും രാമലക്ഷ്‌മി (4.5 കിലോഗ്രാം) മൂന്നാം സ്ഥാനവും നേടി ആവേശം വിതറിയ മത്സിസരം സിപിഐ എം ജില്ലാ സെക്രട്ടറി എസ് സുദേവൻ ഉദ്ഘാടനം ചെയ്‌തു. ബ്ലോക്ക് പഞ്ചായത്ത് അംഗം ലേഖ ഗോപാലകൃഷ്‌ണൻ ചടങ്ങിൽ അധ്യക്ഷയായി. സിഐടിയു ജില്ലാ സെക്രട്ടറി എസ് ജയമോഹൻ, പി സജി, എസ് ബിജു, എം എ രാജഗോപാൽ, എ ആർ കുഞ്ഞുമോൻ, വി എസ് മണി, പി രാജു. ശ്യാംമോഹൻ, പി ശ്രീനാഥ് എന്നിവർ സംസാരിച്ചു ജേതാക്കൾക്കുള്ള സമ്മാനത്തുകയും മത്സരത്തിൽ പങ്കെടുത്ത തൊഴിലാളികൾക്ക് ക്യാഷ് അവാർഡും എസ് സുദേവൻ വിതരണംചെയ്‌തു.