മൂക്കൻ ചാത്തനും വേലയും

03/02/2025 1.10pm

തൃശൂർ : മൂക്കൻ ചാത്തനും വേലയും ഒപ്പം കാളക്കളിയും. നാടൻ പാട്ടും നാട്ടുപൊലിമയും ചേർന്ന സംഗമത്തിന് നിറഞ്ഞ കൈയടിയോടെ വരവേൽപ്പ് നൽകി കുന്നംകുളം നഗരം. സംസ്‌കാരിക പൈതൃകത്തിൻ്റെയും നാടൻ കലാരൂപങ്ങളുടെയും ആവേശം പുതുക്കിയുള്ള ഫോക്ക്‌ലോർ ഡേ കുന്നംകുളം നഗരം ഒന്നടങ്കം ഏറ്റെടുത്തു കഴിഞ്ഞു. വിവിധ നാടൻ കലാരൂപങ്ങൾ ഉൾക്കൊള്ളിച്ചുള്ള പരിപാടി സിപിഐ എം ജില്ലാ സമ്മേളനത്തിൻ്റെ ഭാ​ഗമായാണ് അരങ്ങേറിയത്. കുന്നംകുളം നഗരത്തിൽ നടന്ന ഘോഷയാത്രയിൽ നൂറുകണക്കിനാളുകൾ പങ്കെടുത്തു പഞ്ചവാദ്യം, കോൽക്കളി, മരംകൊട്ടിപ്പാട്ട്, മൂക്കൻ ചാത്തനും വേലയും, കാളക്കളി എന്നിവ ഘോഷയാത്രയിൽ അണിനിരന്നു. പാരമ്പര്യത്തിൻ്റെ മണ്ണിൽ ഉടലെടുത്ത കലയെ പുതിയ തലമുറയിലേക്ക് എത്തിക്കുന്നതിനും കൂടിയാണ് പരിപാടി സംഘടിപ്പിച്ചത്. ജില്ലാ സെക്രട്ടറിയറ്റംഗം ടി കെ വാസു ഉദ്ഘാടനം ചെയ്‌തു. പികെഎസ് ഏരിയ സെക്രട്ടറി സി ജി രഘുനാഥ് അധ്യക്ഷനായി. സിപിഐ എം സംസ്ഥാന കമ്മിറ്റിയംഗം എ സി മൊയ്‌തീൻ, ജില്ലാ കമ്മിറ്റിയംഗങ്ങളായ എം എൻ സത്യൻ, കെ എഫ് ഡേവിസ്, ഏരിയ സെക്രട്ടറി കെ കൊച്ചനിയൻ, കെഎസ്കെടിയു ജില്ലാ പ്രസിഡൻ്റ് എം കെ പ്രഭാകരൻ, പികെഎസ് ജില്ലാ സെക്രട്ടറി കെ വി രാജേഷ്, നഗരസഭ ചെയർപേഴ്‌സൺ സീത രവീന്ദ്രൻ, ചൊവ്വന്നൂർ ബ്ലോക്ക് പഞ്ചായത്ത് പ്രസിഡൻ്റ് ആൻസി വില്യംസ്, കെ ബി ഷിബു എന്നിവർ സംസാരിച്ചു